અમદાવાદ:
અમદાવાદના પવિત્ર સાબરમતી રિવરફ્રન્ટ ખાતે રવિવાર, તા. 1 ફેબ્રુઆરી 2026ના રોજ ગંગા સમગ્રના ઉપક્રમે પાંચ કુંડી પર્યાવરણ ગાયત્રી મહાયજ્ઞ તથા સાબરમતી–ગંગા આરતીનો અત્યંત ભવ્ય, ભક્તિમય અને આધ્યાત્મિક કાર્યક્રમ યોજાયો. આ કાર્યક્રમનો મુખ્ય હેતુ પર્યાવરણ સંરક્ષણ, નદી સ્વચ્છતા, જળ સંરક્ષણ તથા આધ્યાત્મિક જાગૃતિ ફેલાવવાનો હતો.

આ પવિત્ર કાર્યક્રમનું નેતૃત્વ ગંગા સમગ્રના રાષ્ટ્રીય કાર્યકારિણી સભ્ય શ્રીમતી નીતુ ધારિયાલ ખેમાણીએ કર્યું. તેમના માર્ગદર્શન હેઠળ યોજાયેલા મહાયજ્ઞમાં વૈદિક મંત્રોચ્ચાર સાથે પાંચ કુંડીઓમાં હવન કરવામાં આવ્યો, જેમાં પર્યાવરણ શુદ્ધિ અને માનવ કલ્યાણ માટે પ્રાર્થનાઓ કરવામાં આવી.

કાર્યક્રમમાં વેજલપુરના ધારાસભ્ય શ્રી અમિતભાઈ ઠાકર, કર્ણાવતી મહાનગર ભાજપના મહામંત્રી શ્રી ભૂષણભાઈ ભટ્ટ, મહિલા ઉદ્યોગસાહસિક શ્રીમતી પ્રિયાબેન પટેલ તેમજ બિઝનેસ એન્ટરપ્રેન્યુઅર શ્રી વિજયભાઈ ધારિયાલએ ખાસ હાજરી આપી. મહેમાનોએ પોતાના સંબોધનમાં નદી સ્વચ્છતા, પ્રકૃતિ સંરક્ષણ અને ધાર્મિક સંસ્કાર વચ્ચેના ગાઢ સંબંધ અંગે પોતાના વિચારો વ્યક્ત કર્યા.

આ ઉપરાંત મ્યુનિસિપલ કાઉન્સેલર શ્રી પંકજભાઈ ભટ્ટ, જમાલપુર ભાજપ તરફથી શ્રી રવિભાઈ ચુડાસમા અને શ્રી જયેશ રામી, સંઘ તરફથી શ્રી અમરીશભાઈ અને શ્રી ભાવેશભાઈ, શ્રી ભગીરથ મહારાજ, ગંગા સમગ્ર તરફથી શ્રી પવનભાઈ મિશ્રા તથા શ્રી મુકેશ ચાવડા, તેમજ સ્થાનિક આગેવાન દીપાબેન સહિત અનેક સામાજિક, ધાર્મિક અને રાજકીય આગેવાનો ઉપસ્થિત રહ્યા હતા.

સાંજના સમયે યોજાયેલી સાબરમતી–ગંગા આરતીએ સમગ્ર રિવરફ્રન્ટને ભક્તિ અને આધ્યાત્મિકતાના રંગે રંગી દીધો. દીપોની ઝળહળાટ, મંત્રોચ્ચાર અને શંખનાદ વચ્ચે યોજાયેલી આરતીમાં મોટી સંખ્યામાં શ્રદ્ધાળુઓ જોડાયા હતા. અમદાવાદના વિવિધ વિસ્તારોમાંથી તેમજ વિવિધ સમાજોના લોકો આ પવિત્ર કાર્યક્રમમાં ઉત્સાહપૂર્વક હાજર રહ્યા.

કાર્યક્રમ દરમિયાન ગંગા સમગ્ર દ્વારા નદી પ્રદૂષણ રોકવા, પ્લાસ્ટિકના ઉપયોગમાં ઘટાડો કરવા, વૃક્ષારોપણ અને સ્વચ્છતા અભિયાનને પ્રોત્સાહન આપવા અંગે મહત્વપૂર્ણ સંદેશ આપવામાં આવ્યો. વક્તાઓએ જણાવ્યું કે પર્યાવરણનું રક્ષણ કરવું એ માત્ર સામાજિક ફરજ નહીં પરંતુ આધ્યાત્મિક જવાબદારી પણ છે.

આ ભવ્ય આયોજનને ઉપસ્થિત નાગરિકો અને આગેવાનોએ ખૂબ સરાહ્યું અને એકસ્વરે જણાવ્યું કે આવા ધાર્મિક તથા પર્યાવરણ જાગૃતિના કાર્યક્રમો સતત યોજાતા રહેવા જોઈએ, જેથી આવનારી પેઢીને સ્વચ્છ અને સુરક્ષિત પર્યાવરણ મળી રહે.

રિપોર્ટ: બ્યુરો ચીફ, ગુજરાત પ્રવાસી ન્યૂઝ
વેબસાઇટ: www.gujaratpravasi.com